Një ngjarje e pazakontë ka ndodhur në Ksamil, ku një 40-vjeçar, Gerti Kallojeri, është gjetur i pajetë në banesën e tij mbrëmjen e së shtunës.

Sipas burimeve, 40-vjeçari kishte vetëm katër ditë që ishte kthyer nga Greqia, ku punonte prej vitesh. Ka qenë nëna e tij ajo që ka bërë zbulimin tronditës, duke gjetur të birin pa shenja jete në shtëpi.

Fillimisht, familjarët nuk njoftuan policinë apo spitalin për të përcaktuar shkakun e vdekjes, por kontaktuan shërbimin funeral, i cili nisi përgatitjet për ceremoninë e varrimit pa kërkuar ndonjë raport mjekësor.

Në momentin që autoritetet u njoftuan për rastin, Prokuroria e Sarandës dhe policia ndërhynë duke ndaluar varrimin, pasi nuk ishte përcaktuar shkaku i vdekjes. Pas verifikimeve, u dha urdhër për transportimin e trupit drejt Institutit të Mjekësisë Ligjore në Tiranë, ku do të kryhet ekspertiza për të zbuluar rrethanat e sakta të ngjarjes.

Burime nga vendngjarja bëjnë me dije se stafi i shërbimit funeral ka deklaruar për hetuesit se ishte njoftuar nga familjarët se ishin kryer të gjitha veprimet ligjore, pa qenë në dijeni se nuk kishte asnjë raport mjeko-ligjor.
Nga ana tjetër, familjarët e viktimës nuk kanë bërë asnjë pretendim ndaj vendimit të autoriteteve për të pezulluar varrimin derisa të dalin rezultatet e autopsisë.

Hetimet për zbardhjen e plotë të rrethanave të vdekjes së 40-vjeçarit vijojnë nën drejtimin e Prokurorisë së Sarandës.