Ukraina ka akuzuar sërish të dielën Rusinë se është duke bombarduar centralin bërthamor në qytetin Zaporizhja, dhe ka bërë thirrje për sanksione ndërkombëtare ndaj Moskës për shkaktim të “terrorit bërthamor”.
Gjatë një bisede telefonike me presidentin e Këshillit Evropian, Charles Michel, Zelensky bëri thirrje për vendosjen e sanksioneve ndaj industrisë bërthamore ruse dhe karburantit bërthamor.
“Terrori bërthamor i shkaktuar nga Rusia kërkon përgjigje të fuqishme nga komuniteti ndërkombëtar – sanksione ndaj industrisë bërthamore ruse”, ka thënë presidenti ukrainas, Volodymyr Zelensky përmes një postimi në Twitter.
Kompania shtetërore në Ukrainë ka thënë se si pasojë e sulmeve ruse ditën e shtunë, ka mbetur i plagosur një punëtor dhe janë dëmtuar tre sensorë për rrezatim.
Ky central, që gjendet në territor që tani kontrollohet nga forcat ruse, është bombarduar edhe të premten. Moska i ka fajësuar forcat ukrainase për këto sulme.
