Uragani i fuqishëm Helene ka shkaktuar shirat masivë që kanë lënë mijëra njerëz të bllokuar dhe pa strehë, duke shkaktuar një situatë emergjente në të gjithë Juglindjen e Shteteve të Bashkuara. Pas stuhisë, të paktën 64 persona kanë humbur jetën, ndërsa miliona njerëz kanë mbetur pa energji elektrike. Helene preku tokën në Florida si një stuhi e kategorisë 4 të enjten vonë, duke sjellë erëra me shpejtësi 225 kilometra në orë.
Pas kalimit të uraganit, stuhia u zhvendos me shpejtësi përmes Xhorxhias, ku guvernatori Brian Kemp deklaroi se situata dukej “sikur kishte shpërthyer një bombë” pas një inspektimi ajror të shtëpive të shkatërruara dhe autostradave të mbuluara me mbetje.
Pasi humbi fuqinë e uraganit, Helene vazhdoi të shkaktojë shira të rrëmbyeshëm në Karolinën e Veriut dhe të Jugut, si dhe në Tenesi, duke përmbytur brigjet dhe sfiduar digat. Qindra njerëz janë shpëtuar nga përmbytjet, përfshirë një rast dramatik në një spital në një zonë rurale të Tenesisë, ku dhjetëra pacientë dhe personel mjekësor u shpëtuan me helikopter nga çatia e spitalit të premten.
Stuhia, tani e zbutur dhe e transformuar në një ciklon post-tropikal, pritej të kalonte Luginën e Tenesisë gjatë fundjavës, sipas Qendrës Kombëtare të Uraganeve. Helene shkaktoi përmbytjet më të rënda të shekullit në Karolinën e Veriut, ndërsa shirat e dendur vazhduan edhe në Atlanta për 48 orë me radhë.
Presidenti Joe Biden e quajti shkatërrimin nga Helene “dërrmues” dhe u zotua të dërgojë ndihma për ata që u preken. Ai gjithashtu miratoi një deklaratë për fatkeqësi natyrore për Karolinën e Veriut, duke vënë në dispozicion fonde federale për ndihmën ndaj individëve të prekur.
Në Karolinën e Jugut, Helene shkaktoi vdekjen e të paktën 25 vetëve, duke u bërë kështu cikloni tropikal më vdekjeprurës për shtetin që nga uragani Hugo, i cili mori 35 jetë në vitin 1989. Viktima janë raportuar gjithashtu në Florida, Xhorxhia, Karolinën e Veriut dhe Virxhinia.
Sipas vlerësimit paraprak nga AccuWeather, dëmi total dhe humbjet ekonomike nga Helene në SHBA janë midis 95 dhe 110 miliardë dollarë. Ndryshimet klimatike kanë kontribuar në krijimin e kushteve për stuhi të tilla, që intensifikohen me shpejtësi në ujërat që ngrohen dhe shndërrohen në ciklone të fuqishëm ndonjëherë brenda disa orësh. Helene ishte stuhia e tetë e sezonit të uraganeve në Atlantik, që filloi më 1 qershor, dhe Administrata Kombëtare Oqeanike dhe Atmosferike ka parashikuar një sezon me aktivitet mbi mesataren këtë vit për shkak të temperaturave rekord të ngrohta të oqeanit.
