Grupi Parlamentar i Partisë Socialiste ka paraqitur kërkesë për procedurë të përshpejtuar lidhur me projektligjin që synon përfshirjen e Shqipërisë në Bordin e Paqes, duke e futur çështjen në rend dite me urgjencë.

Kërkesa u kundërshtua ashpër nga opozita. Kreu i Grupit Parlamentar të PD, Gazment Bardhi, deklaroi në seancë plenare se urgjenca e vërtetë nuk ka lidhje me projektligjin, por me zhvillimet që po ndodhin paralelisht në Gjykatën Kushtetuese.

“Sot po mbahet seancë në Gjykatën Kushtetuese për pezullimin e Ballukut dhe ju doni ta zhurmoni këtë fakt,” u shpreh Bardhi, duke akuzuar mazhorancën për manipulim politik të agjendës parlamentare.

Ai vijoi me tone edhe më të ashpra, duke thënë:
“Ju nuk doni t’ia dini as për ligj, Kushtetutë apo procedurë. Ju duhet për të zhurmuar zonjën që duhet të ishte në GJK sot, jo këtu. Duhet të ishte në burg sipas kërkesës së SPAK.”

Sipas Bardhit, shumica po përdor Kuvendin për të shmangur vëmendjen nga çështjet gjyqësore dhe për të ushtruar presion mbi institucionet e drejtësisë.
“Duhet të zhurmonin intimidimin që i keni bërë GJK për rastin dhe aferat e Ballukut, e për këtë arsye jeni gati të shkelni çdo ligj dhe çdo procedurë,” theksoi ai.

Debati rreth procedurës së përshpejtuar ka thelluar përplasjet politike në Kuvend, ndërsa pritet që çështja e Bordit të Paqes dhe zhvillimet në Gjykatën Kushtetuese të vijojnë të dominojnë skenën politike në ditët në vijim.