Efektivët e Batalionit të Tretë të Këmbësorisë, pjesë e Regjimentit të Këmbësorisë së Veriut të Forcës Tokësore, kanë përfunduar me sukses një operacion humanitar për të ndihmuar një fëmijë të sëmurë në fshatin Ostren të Bulqizës.

Fëmija, i cili kishte nevojë urgjente për trajtim mjekësor, u transportua fillimisht me një mjet ushtarak të Batalionit, duke kaluar terrenin e vështirë të zonës. Pas kësaj, ai u dorëzua në ambulancë për të vazhduar rrugën drejt spitalit të Bulqizës, ku po merr trajtimin e nevojshëm mjekësor.

Ky operacion demonstron përkushtimin e ushtrisë shqiptare në ndihmë të komuniteteve në nevojë, veçanërisht në zonat e largëta dhe me infrastrukturë të kufizuar. Falë reagimit të shpejtë dhe koordinimit të efektivëve të Forcave të Armatosura, një situatë kritike u trajtua me profesionalizëm dhe përkujdesje.

Këto veprime janë një dëshmi e rolit të rëndësishëm të Forcave të Armatosura si garantues të sigurisë dhe mirëqenies së qytetarëve shqiptarë, jo vetëm në raste emergjencash ushtarake, por edhe humanitare.