Elizaveta Krivonogikh, e cila dyshohet të jetë vajza e Vladimir Putin, mund të ketë jetuar në Paris nën një pseudonim që nga fillimi i pushtimit rus të Ukrainës. Sipas raportimeve nga “Daily Mail”, Elizaveta, tani 21 vjeç, është njohur edhe me emrin Luiza Rozova dhe ka arritur të fshehë lidhjet e saj me presidentin rus duke u paraqitur si një e afërme e Oleg Rudnov, një aleat i ngushtë i Putinit. Ajo është zhdukur pak para shpërthimit të luftës në Ukrainë, por një hetim nga televizioni ukrainas TSN ka zbuluar më shumë detaje për jetën e saj.

Elizaveta ka jetuar një jetë të mbushur me luks, duke udhëtuar me avionë privatë dhe duke organizuar festa të shpeshta me miq nga familjet me ndikim. Para se të zhdukej, ajo ishte studente në Shkollën e Menaxhimit dhe Artit në Paris, por tani besohet se nuk është më aty. Ajo ka një pasaportë që e identifikon si Elizaveta Olegovna Rudnova, një emër që thekson lidhjen e saj me aleatin e Putinit, Oleg Rudnov, dhe fshin çdo mundësi identifikimi me presidentin rus, pasi ajo ka ndryshuar mbiemrin, duke shmangur emrin patronimik “Vladimirovna”, që tregon se është vajza e Putin.

Sipas TSN, Elizaveta dhe nëna e saj, një pastruese 49-vjeçare që tani është bërë milionere, kanë përfituar nga lidhjet e tyre me Putinin. Ajo është parë në muzeun Louvre në vitin 2021 dhe ka pasur një markë mode dhe ka punuar si DJ në Rusi. Në profilin e saj në rrjetet sociale, Elizaveta shpesh postonte momente nga jeta e saj luksoze dhe e shpërndante një imazh të shndritshëm të jetës së saj. Në një rast, kur u pyet për hetimet në lidhje me të, ajo u përgjigj me cinizëm, duke thënë se nuk kishte asnjë problem.