Vajzat e ekipit të volejbollit të Skënderbeut kanë pësuar një aksident të rëndë teksa udhëtonin drejt Tiranës për të zhvilluar ndeshjen e dytë finale. Autobusi në të cilin udhëtonin u përplas me një makinë, duke shkaktuar dëmtime tek disa nga vajzat.

Në një deklaratë të shkurtër për mediat, trajneri i ekipit, Orlando Koja, bëri me dije se disa prej vajzave janë dërguar në urgjencë për shkak të lëndimeve. “Patëm një aksident të rëndë, jemi në Prrenjas. Nja tre vajza kanë shkuar në urgjencë, jemi të dëmtuar dhe të shkundur. Na goditi shumë fort, autobusi është bërë përshesh,” tha Koja.

Ai theksoi se vajzat kanë pësuar dëmtime të ndryshme: njëra ka pasur dëmtime në hundë, tjetra në gju dhe e treta në shpatull. Lajmi ka shqetësuar komunitetin sportiv dhe fansat, ndërkohë që gjithë të tjerët janë në gjendje të stabilizuar.