Emiratet e Bashkuara Arabe po përjetojnë një valë ekstreme të nxehti, me temperaturat që i janë afruar kufirit prej 50 gradë Celsius. Sipas Qendrës Kombëtare të Meteorologjisë (NCM), temperatura më e lartë e regjistruar këtë të enjte ishte 49.3°C, e matur në zonën Bada Dafas, në rajonin Al Dhafrah të Abu Dhabit, rreth orës 14:00.

Ndërkohë, shpejtësia e erës ka variuar nga 10 deri në 25 km/h, me shpërthime të mundshme deri në 35 km/h, çka rrit rrezikun e stuhive të pluhurit, veçanërisht në zonat periferike dhe rrugët ndërqytetëse. Autoritetet kanë bërë thirrje për kujdes të shtuar, sidomos gjatë drejtimit të automjeteve në kushte me shikueshmëri të kufizuar.

Situata rëndohet më tej nga lagështia e lartë, e cila pritet të arrijë deri në 90% në disa zona bregdetare, duke krijuar një ndjesi përvëluese dhe mbytëse për qytetarët.

Autoritetet shëndetësore kanë rekomanduar që qytetarët të shmangin daljet në orët e pikut të vapës dhe të qëndrojnë të hidratuar.