Kandidati i Partisë Socialiste për kryetar Bashkie në Himarë, Vangjel Tavo, ka intensifikuar takimet me qytetarët e zonës, duke vizituar lagje, rrugica dhe fshatra. Ai ka premtuar të jetë një “avokat” dhe “drejtor” i përkushtuar për zhvillimin e Bashkisë Himarë.

Këtë mërkurë, Tavo ka publikuar në rrjetet sociale një takim me banorët e Vranishtit, ku u siguroi ata se përshpejtimi i procesit të pajisjes me certifikata pronësie do të jetë një prioritet. Ai premtoi që çdo banor do të marrë certifikatën e pronësisë, duke theksuar se kjo është një e drejtë bazike e vonuar që do të sigurohet për të gjithë.

“Një proces që përmbyllet së shpejti, deri sa edhe banori i fundit të marrë certifikatën e pronësisë, një e drejtë bazike e vonuar, por që tashmë do t’u sigurohet të gjithë banorëve, pa asnjë dallim,” deklaroi Tavo.