Deputeti i Partisë së Lirisë Petrit Vasili ka paraqitur një amendament në parlament për uljen e TVSH-së së ushqimeve të shportës.

Vasili ka publikuar në rrjetin social Facebook kërkesën e paraqitur në Kuvend, ku sipas tij, propozohet ulja e TVSH-së nga 20% në 5%.

Deputeti thotë se ky amendament duhet votuar unanimisht në Parlament pasi me anë të saj ndihmohen qytetarët.

Vasili ka akuzuar qeverinë se nuk po merr masa dhe në vend të saj, votoi për të kompensuar çmimet e materialeve të ndërtimit për kompanitë që kishin fituar tenderat me 99% të fondit limit.

POSTIMI I PLOTË
Paraqita Amendamentin për uljen drastike të TVSH së ushqimeve të shportës!
Në këto momente kaq të vështira për ekonominë e familjeve shqiptare, ku mjaft familje përballen me mbijetesën ushqimore ulja drastike e TVSH për ushqimet e shportës është masa më parë dhe më e domosdoshme.

Kam paraqitur Amendament për uljen e TVSH nga 20% që është aktualisht, në masën 5%.
Kjo është një ndihmë konkrete për uljen e çmimeve të produkteve bazë ushqimore.
BE ka mbështetur në vendet anëtare aplikimin e harmonizuar të TVSH- ve tepër të ulëta për produktet bazë ushqimore.
Shqipëria është shumë-shumë vonë!!
Ky amendament duhet votuar me unanimitet në Parlament.
Edhe qeveria duhet ta votojë sepse ndihmohen qytetarët e thjeshtë dhe ata në nevojë në mënyrë të veçantë.
Qeveria votoi për të kompensuar çmimet e materialeve të ndërtimit për kompanitë, që kishin fituar tenderat me 99% dhe nuk mund të ketë kurajë të votojë kundër këtij amendamenti.
Qytetarët do të shikojnë me sytë e tyre të enjten në seancë plenare në Kuvend se kush do të votojë ‘pro’ dhe ‘kundër’ tyre.