Autoritetet shëndetësore të Washingtonit konfirmuan vdekjen e personit që ishte diagnostikuar me varianin H5N5 të Gripit të Shpendëve, duke u bërë i pari pacient në botë me këtë variant. Viktima ishte një i moshuar me sëmundje bashkëshoqëruese, i cili ishte infektuar pasi mbante në oborr një tufë shpendësh shtëpiak. Identiteti i tij nuk u bë publik për të respektuar privatësinë e familjes.

Sipas autoriteteve, H5N5 është një variant i ri i gripit aviar, i cili ishte identifikuar më parë tek kafshët, por kurrë tek njerëzit. Deri më tani, rreziku i përhapjes së tij tek njerëzit mbetet i ulët dhe nuk ka prova për transmetim nga njeriu tek njeriu.

Gripi i shpendëve, i njohur edhe si gripi aviar, ka qarkulluar prej dekadash tek shpendët, por vitet e fundit ka filluar të shfaqet gjithnjë e më shpesh edhe tek gjitarët. Në mars 2024, Departamenti Amerikan i Bujqësisë njoftoi se një tjetër variant i gripit, i cili kishte prekur miliona shpendë në SHBA, ishte identifikuar tek disa gjitarë.

Që nga ajo kohë, janë regjistruar të paktën 70 raste të konfirmuara tek njerëzit në Shtetet e Bashkuara. Shumica e infeksioneve kanë qenë të lehta, me simptoma si skuqje të syve dhe temperaturë, megjithatë disa raste kanë shfaqur simptoma më të rënda. Në janar të këtij viti, u konfirmua edhe vdekja e parë nga gripi i shpendëve tek një pacient tjetër i moshuar me probleme shëndetësore.

Departamenti i Shëndetësisë në SHBA theksoi se autoritetet do të monitorojnë situatën nga afër dhe këshillojnë qytetarët të marrin masa të kujdesshme kur kanë kontakt me shpendët shtëpiakë.