Vetëm pak ditë pasi Gjykata Kushtetuese vendosi rikthimin e tij në detyrën e kryebashkiakut, Erion Veliaj ka dhënë urdhrat e parë nga qelia. Burime nga Bashkia e Tiranës bëjnë me dije se Veliaj ka kërkuar nisjen e menjëhershme të dekorimeve për festat e fundvitit në kryeqytet.

Sipas burimeve, punonjësit e bashkisë kanë filluar përgatitjet për vendosjen e dritave dhe instalimeve festive në qendër të Tiranës dhe në njësitë e tjera administrative. Pritet që, ashtu si çdo vit, sheshi “Skënderbej” të jetë epiqendra e aktiviteteve festive me pemën gjigante, tregun e fundvitit dhe koncertet tradicionale.

Vendimi për të vijuar me dekorimet, pavarësisht situatës ligjore të Veliajt, është interpretuar nga bashkia si “një mesazh normaliteti dhe vazhdimësie për qytetin”.