Hera e parë për Ballkanin, që në një vend të tijin të mbahet KNT-ja. Rama, gjatë fjalës së tij, shfaqi mikpritjen ndaj 38 vendeve pjesëmarrëse, sa kaq i fton ata të ndihen zotër të shtëpisë sonë. Më tej, kryeministri i vendit ceku dhe një frazë tjetër, atë që opozita flet për Shqipërinë, ku e cilësojnë si një vend monist, të mbytur nga krimi dhe mafia. Ai i quan këto stereotipe dhe siguron përfaqësuesit e mbledhur në organizimin e sotëm se pjesërisht këto tema i përkasin së shkuarës dhe përdoren me dashakeqësi nga kundërshtarët politik.

Rama:

Shtëpia e shqiptarit është e zotit dhe e mikut kështu shkruan kodi i shqiptarëve, i pari ligj i shkruar i këtij vendi 5 shekuj më parë dhe për sa kohë zoti na vjen në derë përmes atij që shfaqet në prag, ky i fundit është zot shpie për aq kohë sa qëndron mes nesh. Prandaj të dashur miq nga 38 vende të botës në këtë konventë ndërkombëtare të turizmit ndihuni zotër të shtëpinë tonë.

Shijojini sa të mundeni dallimin e skajshëm mes stereotipit të Shqipërisë dhe perceptimit të vetë shqisave tuaja. Ju siguroj që ky që shikoni është i vërtetë ndërsa vendi i krimit, mafias, varfësisë ekstreme, hajdutëve në çdo rrugë apo të pastrehëve është pjesërisht një vend të cilin ne e kemi lënë pas në të shkuarën dhe pjesërisht një vend që e mban gjallë në retorikën e tyre dashakeqe dhe spekulante vendas dhe të huaj me gojën e tyre apo me penën e tyre.