Me “shkronjat e kuqe të ndezura” është shkruar në histori kjo verë, që sipas të dhënave të shërbimit evropian Copernicus, ishte vera më e nxehtë ndonjëherë e regjistruar. Temperaturat shumë të larta që nisën para fillimit zyrtar të verës vazhduan pothuajse pa ndërprerje gjatë gjithë sezonit. Shkencëtarët raportojnë se temperaturat e larta (mbi 35 gradë Celsius) kanë vazhduar edhe në javën e parë të shtatorit, duke arritur një maksimum historik në rajonet veriore të Evropës, si Sllovenia, e cila për herë të parë regjistroi temperaturë mbi 35 gradë në shtator.
Sipas Observatorit të BE-së për Klimën, vera e vitit 2024 ka tejkaluar temperaturat globale rekord që nga 1940, duke e bërë këtë vit më të ngrohtë ndonjëherë. Sipas të dhënave të Copernicus, temperatura mesatare globale midis qershorit dhe gushtit 2024 ishte 16.8 gradë Celsius, 0.69 gradë më e lartë se mesatarja e periudhës 1991-2020.
Zëvendësdrejtoresha e agjencisë, Samantha Burgess, ka paralajmëruar se ngjarjet ekstreme të motit do të bëhen më intensive nëse nuk reduktohen urgjentisht emetimet e gazit serrë. Sipas saj, emetimet nga djegia e karburanteve fosile janë shkaku kryesor i ndryshimit të klimës. Gushti i vitit 2024 ishte më i ngrohtë globalisht, me një temperaturë mesatare prej 16.82°C, që është 0.71°C mbi mesataren e gushtit 1991-2020 dhe 1.51°C mbi nivelet para-industriale.
Për 12 muajt e fundit, temperatura mesatare globale është më e lartë se ndonjë periudhë tjetër 12-mujore, duke arritur 0.76°C mbi mesataren 1991-2020 dhe 1.64°C mbi mesataren para-industriale të viteve 1850-1900. Nëse trendi vazhdon, viti 2024 ka gjasa të jetë më i ngrohtë ndonjëherë.
Ndërsa Evropa Perëndimore dhe Veriore kanë pasur një verë më të lagësht se mesatarja, pjesa më e madhe e Mesdheut dhe Evropës Lindore ka përjetuar kushte më të thata se mesatarja, duke shkaktuar thatësira. Temperaturat mesatare të tokës evropiane për gushtin 2024 ishin 1.57°C më të larta se mesatarja e gushtit 1991-2020.
Sipas drejtori të Copernicus, Carlo Buodembo, ndonëse fenomeni “El Niño” ka kontribuar në ngrohjen globale, efekti kryesor është ndryshimi afatgjatë i klimës i shkaktuar nga njerëzit, përmes djegies së qymyrit, naftës dhe gazit natyror. Ai paralajmëron se kjo valë nxehtësie është pjesë e një tendence më të gjerë dhe se do të përjetojmë më shumë ngjarje ekstreme të motit në të ardhmen.
