Një ngjarje e rëndë ka tronditur këtë mëngjes kryeqytetin, ku një grua 38-vjeçare është gjetur e pajetë brenda një automjeti në zonën e Liqenit të Thatë në Tiranë. Sipas të dhënave paraprake, viktima dyshohet se i ka dhënë fund jetës me armë zjarri, ndërsa ndodhej në një makinë tip Volvo.

E ndjera është identifikuar si Erelina Xh., 38 vjeç, e cila u gjet e vetme në automjet, e ulur në sediljen e pasagjerit. Pranë saj u gjet edhe arma e zjarrit, me të cilën dyshohet se është vetëvrarë.

Policia mbërriti menjëherë në vendngjarje dhe ka nisur hetimet për të sqaruar rrethanat. Burime nga grupi hetimor bëjnë me dije se po analizohen kamerat e sigurisë në zonë, për të përjashtuar pistat e tjera të mundshme, përfshirë edhe një veprim të qëllimshëm nga persona të tretë.

Motivet e mundshme të ngjarjes mbeten të paqarta dhe pritet që hetimet të hedhin dritë mbi shkaqet që çuan në këtë tragjedi.

Trupi i pajetë është dërguar në Institutin e Mjekësisë Ligjore për ekspertizë, cndërsa familjarët janë njoftuar dhe janë marrë në pyetje nga hetuesit.

Kjo ngjarje rikthen në vëmendje nevojën për ndërhyrje më të forta institucionale në fushën e shëndetit mendor dhe mbështetjes psikologjike, në një kohë kur numri i vetëvrasjeve në vend vijon të jetë shqetësues.