Operacionet e kërkim-shpëtimit vazhdojnë pa ndërprerje në Valencia të Spanjës, ku bilanci tragjik i katastrofës nga moti ekstrem është ndalur për momentin në 158 viktima. Kjo shifër u konfirmua nga Qendra Koordinuese e Emergjencave, e cila njoftoi se gjatë natës u gjetën edhe 3 persona të pajetë. Megjithatë, mediat e huaja raportojnë se situata nuk është shumë optimiste, veçanërisht kur bëhet fjalë për bilancin e jetëve të humbura.

Përveç viktimave, autoritetet konfirmojnë se rreth 120 mijë persona janë zhvendosur nga banesat e tyre për shkak të dëmeve të shkaktuara nga përmbytjet. Situata me njerëzit e zhdukur mbetet e paqartë, pasi aktualisht nuk ka një numër të saktë për këtë kategori. Qindra njerëz janë detyruar të prenotojnë hotele në Valencia, qyteti më i prekur nga katastrofa, ku janë angazhuar mbi 1000 forca të ushtrisë për të ndihmuar në operacionet e shpëtimit.

Zona tani është mbuluar nga balta, e cila ka bllokuar të paktën 119 rrugë rurale. Fshatra të tëra janë bllokuar, duke detyruar rojet civile të kryejnë shumicën e operacioneve nga ajri. Gjatë natës, 250 persona janë shpëtuar nga ajri, ndërsa 70 të tjerë janë ndihmuar në rrugët tokësore, sipas raportimeve të ANSA.

Operacionet e shpëtimit do të vazhdojnë pa ndërprerje deri në një njoftim të ardhshëm, dhe sot pritet që kryeministri Pedro Sanchez të vizitojë zonat e prekura për të parë nga afër situatën.

Ndërkohë, katastrofa klimatike ka nxitur një debat mbi një alarm që duhej të ishte dhënë më herët, i cili mund të kishte ndihmuar në shpëtimin e jetëve. Kryebashkiaku i Valencias, Carlos Mazon, është mbrojtur nga akuzat për mungesë vigjilence, duke deklaruar se paralajmërimet për përkeqësimin e motit janë dhënë që nga e diela.