Pamjet e transmetuara nga mediat lokale treguan re të mëdha tymi dhe një zjarr të madh që shpërtheu në vendin e ngjarjes në Kahramankazan, një qytet i vogël rreth 40 kilometra në veri të Ankarasë, pas një sulmi ndaj selisë së Turkish Aerospace Industries (TUSAS). Presidenti turk Rexhep Tajip Erdogan, i cili ndodhej në Kazan të Rusisë për Samitin e BRICS, e dënoi sulmin si një akt terrorist të rëndë. Ministri i Brendshëm i Turqisë, Ali Yerlikaya, konfirmoi se dy terroristë ishin vrarë gjatë incidentit.

Pamjet e kamerave të sigurisë zbuluan një grup sulmuesish që mbërritën në kompleks me një taksi gjatë ndërrimit të turnit të personelit të sigurisë. Sipas një raporti të Associated Press, një prej sulmuesve shpërtheu një bombë, duke shkaktuar panik dhe duke krijuar një hapësirë për të armatosurit, përfshirë një grua, për të hyrë në ndërtesën e kompanisë. Televizioni privat NTV raportoi se disa persona brenda kompleksit mund të jenë marrë peng.

Ndërsa motivet dhe natyra e saktë e sulmit ende nuk janë qartësuar plotësisht, disa raporte mediatike sugjeruan se mund të jetë përfshirë një sulm vetëvrasës. Forcat e sigurisë, shërbimet e urgjencës, përfshirë ambulancat dhe zjarrfikësit, u dërguan menjëherë në vendin e ngjarjes, sipas Agjencisë shtetërore Anadolu.