Në Shkodër, dy vëllezër, Elvis Serraj dhe Klevis Serraj, janë arrestuar pasi akuzohen për djegien e makinave të përdorura nga agjenti i krimeve Ergys Lohja. Incidenti ndodhi më 30 tetor në lagjen “Kongresi i Përmetit,” ku makinat e Sabaudin Hoxhës, vjehërrit të Lohjas, u shkrumbuan nga flakët. Policia ka shpallur në kërkim Gjekson Pusin, person me precedentë penal, i dyshuar si porositësi i djegies.

Gjekson Pusi ka një histori kriminale, përfshirë arrestimin e tij më 30 qershor 2020 si bashkëpunëtor në vrasjen e biznesmenit Hekuran Billa, ku dyshohet se shërbeu si shofer për Viktor Markun, autorin e atentatit ndaj Billës pranë një qendre tregtare në Tiranë.

Falë kamerave të sigurisë, policia ka kapur momentin kur dy vëllezërit hynë në oborr, vendosën një shishe benzine para makinave dhe i vunë zjarrin. Në kuadër të operacionit “Porositësi”, policia informoi se gjatë kontrollit në banesën e të arrestuarve, sekuestruan veshjet, biçikletën e përdorur gjatë aktit, një armë zjarri automatik, një sasi kanabisi dhe 18 aparate celularë.