Ministri për Evropën dhe Punët e Jashtme, Igli Hasani, në deklaratën e përbashkët për media me Ministrin e Punëve të Jashtme të Ukrainës, Dmytro Kuleba, pas zhvillimit të takimit dypalësh, shprehu vendosmërinë e vazhdueshme të Shqipërisë për rivendosjen e integritetit territorial, sovranitetit, pavarësisë dhe lirisë së Ukrainës. Ministri Hasani përsëriti sërish mbështetjen për sovranitetin, lirinë, pavarësinë, dhe tërësinë territoriale të Ukrainës, duke dënuar me forcë agresionin rus ndaj saj.

Në bashkëpunim me aktorë dhe vende të tjera, Shqipëria ka marrë angazhimin për realizimin e planit me 10 pika të presidentit Zelensky, duke synuar të sjellë fundin e luftës dhe të arriturjen e një paqeje të qëndrueshme.

Nga ana tjetër, ministri i Jashtëm i Ukrainës, Dmytro Kuleba, e konsideroi Shqipërinë si një vend mik dhe shprehu mirënjohjen për mbështetjen e vazhdueshme të Shqipërisë ndaj Ukrainës, duke theksuar rëndësinë e bashkëpunimit mes dy vendeve. Ministri Kuleba vlerësoi veçanërisht angazhimin humanitar të Shqipërisë në ndihmën për fëmijët ukrainas të prekur nga konflikti.

Dy ministrat konfirmuan vullnetin e tyre për forcimin e marrëdhënieve dypalëshe dhe përhapjen e bashkëpunimit ekonomik midis vendeve, si dhe për hapjen e Ambasadës së Shqipërisë në Kiev brenda këtij viti.