Një ngjarje tragjike ndodhi në Huancayo, Peru, ku një lojtar humbi jetën dhe katër të tjerë u lënduan pasi u goditën nga rrufeja gjatë një ndeshjeje futbolli. Incidenti ndodhi në stadiumin ‘Coto Coto’, ndërsa po zhvillohej ndeshja mes ekipit Juventud Bellavista dhe Familia Chocca.

Sipas raportimeve të mediave lokale, arbitri kishte pezulluar ndeshjen për shkak të fillimit të një stuhie. Ndërsa lojtarët po lëviznin drejt dhomave të zhveshjes, rrufeja goditi disa prej tyre. Futbollisti i vrarë është identifikuar si Hugo De la Cruz Meza, 34 vjeç.

Të lënduarit përfshijnë: Juan Choça Llacta, 42 vjeç, Erick Estiven Chente Cuyllor, 19 vjeç, Cristian César Pituy Cahuana, 24 vjeç, dhe një 16-vjeçar, emri i të cilit nuk është bërë i ditur. Ngjarja ka shkaktuar tronditje në komunitetin sportiv dhe autoritetet po hetojnë për rrethanat e këtij incidenti të rëndë.