Një ngjarje e rëndë ndodhi mbrëmjen e djeshme në rrugën nacionale Shkodër-Velipojë, përballë hotelit “Holiday”, ku dy vëllezërit pronarë të hotelit, Edmir dhe Gëzim Frroku, vranë me armë zjarri 33-vjeçarin Ersild Ishmi dhe kunatin e tij, Arsid Hoxha, 22 vjeç.

Sipas burimeve, viktimat kishin shkuar për t’u sqaruar me pronarët e hotelit, por konflikti eskaloi në dhunë të armatosur.

Ngjarja e ka zanafillën në një incident të ndodhur më 28 qershor, kur Ersild Ishmi, gjatë një dreke në hotel, ndërhyri në një debat mes kushëririt të tij, kamerierit, dhe kuzhinierit për shkak të vonesës së porosisë. Në këtë konflikt, Ishmi kishte nxjerrë një pistoletë dhe kishte kërcënuar kuzhinierin. Pamjet e publikuara tregojnë se situata filloi me një bisedë të qetë, por më pas agravoi në konfrontim fizik, ku ishin të përfshirë edhe persona të tjerë, përfshirë një grua.

Kjo përplasje përfundoi tragjikisht me vrasjen e dy të rinjve. Policia ka nisur hetimet për të sqaruar rrethanat e ngjarjes.