Një video e publikuar në një nga televizionet më të ndjekura në SHBA, Abc7, ka ngjallur reagime të shumta, duke ngritur pikëpyetje për fatin e këngëtares legjendare shqiptare, Parashqevi Simaku. Në video shfaqet një grua e pastrehë që identifikohet si “Simaku Nohfe,” duke marrë ndihma nga një grup fëmijësh. Megjithatë, mbetet e paqartë nëse gruaja në video është vërtet këngëtarja që elektrizoi skenën shqiptare në vitet ’80.

Spekulimet janë përhapur me shpejtësi në rrjetet sociale, ku shumë përdorues kanë deklaruar se gruaja është Parashqevi Simaku. Ndërkohë, gazetari Blendi Fevziu, i cili shpërndau videon, konfirmoi se bëhet fjalë për këngëtaren e njohur. Ai ka nisur kontakte me avokatë dhe biznesmenë në SHBA për të gjetur mënyra ndihme për artisten.

Fevziu thekson se çdo përpjekje për t’iu afruar asaj ka qenë e vështirë, pasi gruaja largohet sa herë që i flitet në gjuhën shqipe. Kjo ka shtuar misterin dhe shqetësimin rreth gjendjes së saj aktuale.

Parashqevi Simaku, e lindur në Kavajë, ishte një nga këngëtaret më të dashura dhe të suksesshme të Shqipërisë gjatë periudhës së saj të artë. Pas emigrimit të saj në SHBA, ajo u zhduk nga syri i publikut, duke lënë pas një boshllëk të madh në skenën muzikore shqiptare.

Ky zhvillim ka tronditur adhuruesit e saj dhe opinionin publik, të cilët kërkojnë që të bëhen përpjekje të mëdha për të ndihmuar këtë legjendë të muzikës shqiptare, nëse identiteti i saj konfirmohet zyrtarisht.