Një subjekt i shitjes me shumicë është vjedhur gjatë natës në Shkozet të Durrësit, ku persona të paidentifikuar kanë marrë një sasi parash.

Policia në qytetin e Durrësit ka arrestuar një roje private, pasi nuk ka monitoruar kamerat e sigurisë në kompaninë ku ai punonte. Roja i subjektit është arrestuar pasi akuzohet tashmë për shpërdorim detyre pasi gjatë vjedhjes ishte duke fjetur.

Nga kamerat e sigurisë është vërejtur se autorët ishin tre, njëri që ruante jashtë, tjetri brenda ambienteve, dhe ai që ka shkuar e ka marrë paratë tek kasaforta.

“Specialistët për Hetimin e Krimeve në Komisariatin e Policisë Durrës arrestuan në flagrancë, për veprën penale “Shpërdorim detyre”, shtetasin A. H., 58 vjeç, banues në Durrës, me detyrë roje private dhe operator i monitorimit të kamerave të sigurisë në një kompani private në lagjen nr. 14, Durrës, në pronësi të shtetasit A. D., 29 vjeç.

Gjatë natës, në lagjen nr. 14, Durrës, në ambientet e kësaj kompanie, persona ende të paidentifikuar kanë vjedhur një sasi vlere monetare, por shtetasi A. H. nuk ka monitoruar kamerat dhe nuk ka njoftuar Policinë”, thotë policia.