Policia e Tiranës ka vënë në pranga 54-vjeçarin Lefter Seleni si një nga personat që është përfshirë në shkatërrimin e godinës së selisë blu gjatë protestës së 8 janarit.
Sipas njoftimit zyrtar, Seleni ka përdorur mjete të forta gjatë protestës duke thyer dyer e dritare.
Kujtojmë se sot 34 personat e arrestuar për akte të dhunshme në protestën e thirrur nga Berisha do të dalin sot para Gjykatës së Tiranës për tu njohur me masën e sigurisë.
Prokuroria e Tiranës ka kërkuar “arrest në shtëpi” për katër nga personat e vënë në pranga pas protestës së 8 janarit në Selinë Blu.
Njoftimi i Policisë:
DVP Tiranë
Vijojnë veprimet hetimore për identifikimin dhe kapjen e personave të përfshirë në akte dhune dhe shkatërrim prone gjatë protestës së datës 8 janar 2022, në selinë e Partisë Demokratike.
Identifikohet dhe ndalohet 54-vjeçari Lefter Seleni i cili është përfshirë në shkatërrimin e pronës gjatë protestës, duke përdorur mjete të forta.
Specialistët për Hetimin e Krimeve në Komisariatin e Policisë Nr. 1, nën drejtimin e Prokurorisë së Rrethit Gjyqësor Tiranë, në vijim të veprimeve hetimore të kryera në lidhje me shkatërrimin e pronës dhe aktet e dhunës, gjatë protestës së zhvilluar në datën 8 janar 2022, në selinë e Partisë Demokratike, bazuar në provat e grumbulluara, bënë ndalimin e shtetasit L. S., 54 vjeç.
Ndalimi i tij u bë për veprat penale “Organizimi dhe pjesëmarrja në grumbullime e manifestime të paligjshme”, “Prishja e qetësisë publike”, “Pengimi i qarkullimit të mjeteve të transportit”, “Shkatërrimi i pronës” dhe “Prodhimi, mbajtja, blerja apo shitja pa leje e armëve të ftohta”.
Ky shtetas dyshohet se gjatë protestës ka thyer dyer e dritare të selisë së Partisë Demokratike, duke përdorur mjete të forta.
Materialet i kaluan Prokurorisë së Rrethit Gjyqësor Tiranë, për veprime të mëtejshme procedurale.
