Ish ambasadori i Shqipërisë në SHBA, Fatos Tarifa thotë se vizita në Tiranë e Sekretarit amerikan të Shtetit, Antony Blinken, që do të zhvillohet më 15 shkurt, ka në agjendë marrëdhëniet e SHBA me shtetin shqiptar dhe nuk ka vend për takime me opozitën.

Në një intervistë televizive, Tarifa u shpreh se Sali Berisha është i mohuar nga SHBA dhe se për amerikanët, ai nuk ekziston.

Tarifa, ndër të tjera, shtoi se opozita është e përçare dhe destruktive.

“Edhe kjo është nje vizitë ndërshtetërore. Marrëdhënia e DASH, si administratë amerikane, mbahet me qeverinë e Shqipërisë, kryeministër i së cilës është Edi Rama. Ai është mikpritësi në këtë shtëpi dhe ambasada amerikane sigurisht. Për opozitën nuk ka vend. E para, Sali Berisha nuk hyn asgjëkundi këtu. Ai është i mohuar, për SHBA ai nuk ekziston, nuk është një politikan që duhet marrë në konsideratë. Për opozitën tjetër, është e përçarë. Tjetra është një opozitë që ende nuk po jep shenja jete. Nuk besoj hyn në këtë agjendë. Kjo është agjenda për marrëdhëniet e SHBA me shtetin shqiptar, jo me opozitën. Opozita është e ngrehinës politike, por në këtë rast është shteti”, theksoi ai.