Një nga grabitjet më të bujshme të dekadës ka tronditur Francën dhe botën e artit. Bizhuteritë e Napoleonit dhe të Perandoreshës, të ekspozuara në Muzeun e Luvrit në Paris, janë vjedhur në një operacion të përmasave spektakolare, me një vlerë totale që arrin në 88 milionë euro.

Ngjarja, e cilësuar si një “goditje e rëndë për trashëgiminë kulturore franceze”, ka tërhequr vëmendjen ndërkombëtare për shkak të rëndësisë historike të objekteve të grabitura.
Sipas Prokurores Laura Beccuau, vlera e bizhuterive “është shumë më e madhe se ajo materiale”, pasi ato përfaqësojnë një pasuri të jashtëzakonshme historike për Francën dhe Evropën.

Në kuadër të hetimeve, një shtetase kineze është arrestuar në Barcelonë dhe është dorëzuar autoriteteve franceze. Ajo dyshohet të ketë lidhje me grabitjen në Luvër, por edhe me një tjetër incident të ndodhur në Muzeun e Historisë Natyrore, ku në shtatorin e kaluar u vodhën copëza ari me vlerë 1.5 milionë euro.

Sipas burimeve të BFM TV, vjedhja në Luvër u zbulua nga një punonjës i kompanisë së pastrimit, i cili konstatoi rrëmujën në galerinë mineralogjike të muzeut. Hetuesit zbuluan se hajdutët kishin përfituar nga çaktivizimi i sistemit të alarmit, i cili kishte qenë jashtë funksionit prej disa javësh për shkak të një sulmi kibernetik.

Ekspertët e artit e konsiderojnë dëmin të paçmueshëm, përtej vlerës monetare të bizhuterive, pasi objektet përbënin një pjesë unike të historisë së Francës dhe trashëgimisë perandorake.
Galeria e Gjeologjisë dhe Mineralogjisë mbetet e mbyllur, ndërsa hetimet po vazhdojnë intensivisht për të rikuperuar sendet e vjedhura dhe për të identifikuar bashkëpunëtorët e mundshëm.