Lëvizja Vetëvendosje ka mbajtur këtë të dielë mbledhjen e 57-të të Këshillit të Përgjithshëm.
Në këtë mbledhje po merr pjesë edhe kryetari i kësaj partie, njëherazi kryeministri i Kosovës Albin Kurti.
Gjatë fjalës së tij, kryeministri Albin Kurti ka deklaruar se Kosova do të aplikojë për anëtarësim në Këshillin e Evropës, ndërsa shtoi se po përgatiten për aplikim edhe në NATO dhe BE.
“Kemi aplikuar për anëtarësim në Këshillin e Evropës. Anëtarësimi ynë në KiE është vlerë e shtuar për Këshillin dhe mundësi për Kosovën që të përparoj më shumë në fushën e drejtësisë. Jemi duke i bërë përgatitjet për aplikim për anëtarësim në Partneritetin e Paqes në kuadër të NATO-s, e do të aplikojmë edhe për anëtarësim në BE”, tha Kurti.
Kryeministri i Kosovës u shpreh se një vit qeverisje ka qenë mjaft sfidues, duke përmendur pandeminë, krizën energjetike, agresionin rus në Ukrainë e shumë çështje tjera.
“Kemi shënuar rritje ekonomike, kemi bërë hapa të rëndësishëm në forcimin e sistemit të drejtësisë, kemi luftuar krimin e korrupsionin, kemi avancuar aleancat dhe kemi forcuar raportet me shtet mike. Kosova është bërë fanar i demokracisë në rajon”, ka thënë Kurti.
