Prej 12 ditësh, shërbimi veteriner në qarkun e Vlorës ka vijuar me kontrollet e pandërprera në të gjithë territorin për parandalimin dhe identifikimin e gripit të shpendëve. Sipas mjekëve veterinerë, kontrollet janë përqendruar kryesisht në vijën bregdetare, duke përfshirë zonat nga Plazhi i Vjetër deri në kodrat e fshatit Zvërnec, si dhe në fshatrat Poro dhe Nartë.

Fermat e pularive në këtë zonë janë nën mbikëqyrje, por deri tani nuk janë raportuar raste të virusit. Megjithatë, në qarkun e Gjirokastrës është shfaqur një vatër e gripit të shpendëve, ku u gjetën disa pula të ngordhura. Menjëherë pas identifikimit të rastit, zona u izolua dhe shpendët e ngordhur u groposën për të parandaluar përhapjen e mëtejshme të virusit.

Mjekët veterinerë bëjnë apel për të gjithë banorët që mbajnë shpendë në oborret e tyre, të jenë të kujdesshëm dhe të ndjekin udhëzimet e shërbimeve veterinere për të parandaluar çdo infeksion.