Një ngjarje e rëndë ka tronditur komunitetin e Dukatit në Vlorë, ku ka ndërruar jetë 22-vjeçari Fadil Bodoj, pas më shumë se një muaji e gjysmë përpjekjesh për të mbijetuar pas një aksidenti tragjik automobilistik që ndodhi pak pas mesnatës së 6 shtatorit.

I riu u përfshi në një përplasje të fortë frontale në aksin Orikum–Himarë, në zonën e Fushë-Dukatës, ku automjeti tip “Audi”, që drejtohej prej tij, u përplas me një “Fiat” që drejtohej nga Gabriel Lazemetaj, 20 vjeç.

Nga aksidenti u plagosën katër persona — Fadil Bodoj, Gabriel Lazemetaj, Flavio Qepi (20 vjeç) dhe Aldo Kushta (22 vjeç) — të gjithë banues në Dukat.

Pas një qëndrimi të gjatë në Spitalin e Traumës në Tiranë, Fadil Bodoj nuk arriti t’u mbijetonte plagëve të marra dhe ndërroi jetë, duke lënë pas një dhimbje të thellë te familja, miqtë dhe bashkëfshatarët.

Familjarët kanë bërë me dije se ceremonia e varrimit do të mbahet këtë të shtunë në Dukat, ku i riu do të përcillet për në banesën e fundit.