Shprehja popullore “vesi del me shpirtin” ka gjetur vend tek Robert Pekmezi, një 53-vjeçar nga Vlora, i cili, edhe pse ndodhej nën masën e sigurisë “arrest në shtëpi” për një vjedhje të mëparshme, nuk ka hezituar të kryejë një tjetër grabitje.

Disa ditë më parë, në orët e para të mëngjesit, Pekmezi ka thyer masën e sigurisë dhe është nisur për të vjedhur një kamionçinë. Plani i tij duket se ka ecur mirë, pasi ai ka arritur të merrte në makinë një biçikletë, një palë shkallë alumini dhe një kapak kazani rakie. Megjithatë, arratisja e tij është penguar nga një problem me makinën, e cila u fik në mes të rrugës dhe nuk e çoi në destinacionin e planifikuar.

Punonjësit e policisë kanë gjetur makinën e braktisur në afërsi të një karburanti, ku gjithashtu është gjetur edhe Pekmezi, i cili dyshohet se kishte konsumuar alkool. Përveç akuzës për vjedhje, ndaj tij është ngarkuar edhe akuza për drejtim mjeti pa leje, pasi ai nuk ka patentë.

Në deklarimet e tij për policinë, Pekmezi ka shpjeguar se, të dehur, ka dalë nga banesa dhe është nisur për në fshatin Nartë, ku ka parë kamionçinën të braktisur dhe e ka marrë. Pavarësisht kërkesës për mëshirë, gjykata vendosi ta kthejë në burg 53-vjeçarin, duke i shtuar kështu një tjetër veprim të paligjshëm në dosjen e tij.