VLORË – Në orën 07:30 të mëngjesit të sotëm, 32 kilogramë tritol do të përdoren për shembjen e ish-hotelit “Helia” në aksin Vlorë–Orikum. Objekti trekatësh, i cili prej dy vitesh qëndronte gjysmë i shembur për t’i hapur vendin një investimi të ri, është klasifikuar nga Inspektorati Kombëtar i Mbrojtjes së Territorit (IKMT) si ndërtim pa leje.

Ajo që ngre pikëpyetje është se ndërtesa nuk u ngrit brenda një dite. Për gati dy vite, kantieri vijoi punimet me qindra betonierë, pa u penguar nga askush. Kjo periudhë zbulon një mungesë veprimi nga disa institucione, përfshirë Inspektoratin Vendor të Mbrojtjes së Territorit (IMT), IKMT-në, Agjencinë e Bregdetit — pasi objekti ndodhet vetëm 5 metra nga deti — si dhe Policinë e Shtetit dhe zyrën e urbanistikës, që nuk kanë verifikuar dokumentacionin apo respektimin e lejeve.

Kryeministri Edi Rama paralajmëroi masa të rënda:

“Do të ketë penalitete për çdo zyrtar që, në kohën kur objekti po ndërtohej, nuk ka ushtruar funksionin dhe detyrën që i takonte,” deklaroi Rama.

Operacioni i shembjes pritet të kryhet me masa të shtuara sigurie, duke bllokuar përkohësisht qarkullimin në zonë dhe evakuuar perimetrin përreth për të shmangur çdo rrezik.