Një 33-vjeçar ka rënë në prangat e policisë në kryeqytet, pasi vodhi 2 monopatina dhe 3 biçikleta. Shtetasi B.D., është kapur nga kamerat e sigurisë në disa vende të ndryshme, teksa vjedh monopatina.
33-vjeçari rezulton që është dënuar edhe më parë për të njëjtën veprimtari kriminale. Shërbimet e Komisariatit nr.1 në Tiranë bënë të mundur finalizimin e operacionit për arrestimin e B.D. Nga hetimet rezultoi se gjatë 3 muajve të fundit ai kishte vjedhur në zona të ndryshme të Tiranës 3 biçikleta dhe 2 monopatina.
Njoftimi i Policisë:
Tiranë
Finalizohet nga Komisariati i Policisë Nr. 1, operacioni policor i koduar “September”, për zbardhjen e 5 rasteve të përsëritura të vjedhjes së monopatinave dhe biçikletave.
Vihet në pranga një 33-vjeçar, i dënuar më parë për të njëjtën veprimtari kriminale.
Shërbimet e Komisariatit të Policisë Nr. 1, në vijim të punës për goditjen e veprimtarisë kriminale në fushën e vjedhjes, si rezultat i administrimit të menjëhershëm të denoncimeve të qytetarëve të ndryshëm, për raste të vjedhjes së biçikletave dhe monopatinave të tyre, me mbështetjen e inteligjencës policore, kanë organizuar dhe finalizuar operacionin policor të koduar “September”.
Si rezultat i këtij operacioni, u arrestua shtetasi B. (B). D., 33 vjeç, banues në Tiranë.
Nga veprimet hetimore dyshohet se ky shtetas, gjatë muajve të fundit, ka kryer 5 vjedhje në zona të ndryshme të Tiranës, konkretisht:
– Më datë 28.05.2023, dyshohet se ka vjedhur biçikletën e shtetases M. C.;
– Më datë 01.06.2023, dyshohet se ka vjedhur monopatinën e shtetasit A. C.;
– Më datë 14.07.2023, dyshohet se ka vjedhur biçikletën e shtetasit R. B.;
– Më datë 16.08.2023, dyshohet se ka vjedhur biçikletën e shtetasit K. H.;
– Më datë 28.08.2023, dyshohet se ka vjedhur monopatinën e shtetasit E. K.
Vijon puna për zbardhjen e vjedhjeve të tjera që mund të jenë kryer nga ky shtetas.
Materialet procedurale i kaluan Prokurorisë, për veprime të mëtejshme.
