Regjistrimi online nis më 11 janar dhe përfundon më 11 mars – Procesi i votimit dhe numërimit i organizuar nga KQZ

Për herë të parë në historinë e Shqipërisë, në zgjedhjet parlamentare të 11 majit 2025, do të implementohet vota e diasporës. Pas një debati të gjatë mes Partisë Socialiste (PS) dhe Partisë Demokratike (PD), dakordësia për këtë proces u arrit në korrik 2024.

Regjistrimi i votuesve të diasporës do të nisë më 11 janar dhe do të përfundojë më 11 mars. Shqiptarët që jetojnë jashtë vendit do të mund të regjistrohen online duke përdorur një mjet identifikimi zyrtar si pashaporta, karta e identitetit (ID) apo patenta ndërkombëtare. Gjithashtu, ata duhet të plotësojnë edhe adresën e banesës, e cila do të përdoret nga Komisioni Qendror i Zgjedhjeve (KQZ) për të dërguar fletën e votimit.

Procesi i votimit për diasporën:

•Dërgimi i zarfit: KQZ do të dërgojë një zarf për çdo votues, i cili do të përmbajë fletën e votimit, udhëzime për plotësimin e saj, si dhe një manual mbi procedurat e rikthimit të zarfit.

•Afati për kthimin e fletës: Zarfi duhet të mbërrijë në KQZ para orës 19:00 të datës 11 maj, përndryshe nuk do të pranohet.

•Procesi i numërimit: Fletët e votimit do të grupohen në një “Kuti të veçantë të votimit nga jashtë” dhe më pas do të ndahen sipas qarqeve përkatëse. Numërimi nuk do të kryhet nga komisionerët e partive, por nga personel i caktuar nga KQZ.

Rezultati final i votave të diasporës do t’u shtohet votave të secilit qark përkatës dhe do të ketë ndikim të drejtpërdrejtë në rezultatin përfundimtar të zgjedhjeve.

Ky hap historik pritet të rrisë përfaqësimin politik të shqiptarëve jashtë vendit dhe të forcojë lidhjet e tyre me atdheun, duke i dhënë diasporës një zë të rëndësishëm në proceset demokratike të Shqipërisë.