Procesi i votimit për zgjedhjen e drejtuesit të ri të SPAK ka pësuar ndryshime të rëndësishme, pas miratimit të një rregulloreje të re nga Këshilli i Lartë i Prokurorisë.

Sipas procedurës së re, anëtarët e KLP-së nuk do të votojnë më me dorë, por secili do të plotësojë një fletë të bardhë ku do të shënojë emrin e kandidatit që mbështet, së bashku me emrin e tij si votues. Kjo metodë synon rritjen e transparencës dhe shmangien e çdo paqartësie gjatë procesit.

Ndryshimi tjetër thelbësor lidhet me rolin e kryetarit të KLP-së. Për herë të parë, ai nuk do të ketë më dy vota në rast barazimi, por vetëm një votë, njësoj si anëtarët e tjerë. Ky modifikim konsiderohet një hap drejt forcimit të integritetit dhe balancës në vendimmarrje.

KLP do të zhvillojë sot mbledhjen vendimtare për përzgjedhjen e kreut të ri të SPAK. Seanca do të jetë e hapur për mediat dhe do të ndiqet nga përfaqësues të institucioneve kryesore, përfshirë Prokurorinë e Përgjithshme, Ministrinë e Drejtësisë, EU4Justice dhe programin amerikan OPDAT.

Për drejtimin e SPAK garojnë katër kandidatë: Adnand Xholi, Doloreza Musabelliu, Elvin Gogaj dhe Klodian Braho. Për herë të parë, një grua – Doloreza Musabelliu – kandidon për postin më të lartë të strukturës antikorrupsion.

Kandidatët do të paraqesin platformat e tyre përpara anëtarëve të KLP-së, ndërsa më pas do t’i nënshtrohen votimit që do të përcaktojë emrin e ri në krye të SPAK.