Gjykata e Apelit e Juridiksionit të Përgjithshëm ka lënë në fuqi vendimin e gjykatës së Durrësit për masat e arrestit me burg për tre fëmijët e Pëllumb Metës, Hygerta, Hysen dhe Amarildo Meta.

Ata akuzohen se kanë bashkëpunuar në vrasjen dhe fshehjen e trupit të babait të tyre dhe më pas groposjen e tij.

Në një njoftim të gjykatës, thuhet:

“Referuar interesimit të medias, Gjykata e Apelit e Juridiksionit të Përgjithshëm, informon sa më poshtë: Nga aktet e ndodhura në dosje rezulton se, më datë 13.02.2024, rreth orës 22:30, shtetasi me iniciale H.M, banues në fshatin Shën Vlash, Durrës, është paraqitur në Komisariatin e Policisë Durrës dhe ka bërë kallëzim se babai i tij shtetasi me iniciale P.M banues në Shën Vlash, Durrës, është larguar nga banesa me datë 10.02.2024 dhe nuk është kthyer më. Në vijim të veprimeve hetimore, u gjet trupi i pajetë i shtetasit P. M, të dyshuar për kryerjen e kësaj vepre penale janë fëmijët e tij.”Vendimi i Gjykatës së Apelit ka vlerësuar të ligjshëm arrestimin në flagrancë të të dyshuarve për kryerjen e veprave penale të parashikuara në kodin penal. Çështja është shqyrtuar mbi bazën e ankimeve të bëra nga personat nën hetim, dhe në përfundim të gjykimit, Gjykata e Apelit ka vendosur të mbajë në fuqi vendimin për masat e arrestit me burg për të dyshuarit.