Policia e Vlorës ka zbuluar të dhëna të reja lidhur me ngjarjen e rëndë të ndodhur pak ditë më parë, ku mbeti i vrarë 37-vjeçari Renato Hoxhaj. Sipas hetimeve, autori i dyshuar i vrasjes është shtetasi rumun Daniel Cornea, 53 vjeç, i cili ka hyrë në territorin shqiptar në mënyrë të rregullt më 21 prill, rreth orës 17:44, në pikën kufitare të Qafë Botës.

Sipas gazetarit Edison Vatnikaj, Cornea ka hyrë në Shqipëri në këmbë nga territori grek dhe menjëherë pas kalimit të kufirit, ka ndaluar një taksi duke i kërkuar shoferit që ta çonte në Vlorë. Gjatë rrugës, sipas dëshmisë së taksistit, rumuni ka komunikuar në gjuhën greke dhe është prezantuar si banues në Athinë, duke thënë se ka punuar si kapiten anije dhe është i pamartuar.

Për shkak të një problemi shëndetësor të taksistit, udhëtimi është ndërprerë në Shijan të Sarandës, ku Cornea është ndërruar në një tjetër taksi që e ka çuar deri në zonën e Mavronatit.

Dinamika e krimit

Ngjarja e rëndë ndodhi në orët e para të mëngjesit. Rreth orës 04:47, autori i dyshuar zbret nga një automjet tip Land Rover në rrugën “Isa Boletini”, në Vlorë. Kamerat e sigurisë kanë kapur momentin kur Cornea del nga dera e përparme e makinës, mbyll automjetin me pult dhe nis të ecë më këmbë nëpër lagje.

Lëvizjet e tij janë ndjekur përmes kamerave të sigurisë, duke përfshirë zonat përreth lagjes “Hajro Cakërri”, godinës së Prokurorisë, Poliklinikës, dhe më pas deri në rrugicën ku ndodhi vrasja e Renato Hoxhajt. Sipas hetimeve, autori ka qëlluar me armë zjarri katër herë mbi viktimën, duke e lënë të vdekur në vend.

Pas krimit, Cornea është parë të largohet në këmbë në drejtim të rrugëve të tjera të qytetit, ku më pas është kthyer te automjeti Land Rover, i parkuar më herët. Nga aty ka ndjekur itinerarin drejt portit detar, pranë Universitetit të Vlorës, dhe më pas është larguar në drejtim të fshatit Babicë.

Arratisja

Pamjet e siguruara nga kamerat e sigurisë tregojnë se në orën 11:00 të të njëjtës ditë, automjeti Land Rover është konstatuar në zonën e quajtur “Posta Ksamil”, duke ngritur dyshimet se Cornea është larguar nga Shqipëria nëpërmjet kufirit jugor.

Policia është duke ndjekur disa pista hetimore dhe po punon intensivisht në bashkëpunim me partnerët ndërkombëtarë për të lokalizuar dhe arrestuar autorin e dyshuar të këtij ekzekutimi të mirëorganizuar. Ndërkohë, mbeten të paqarta motivet e krimit, por pista e një konflikti të mëparshëm apo e ndonjë porosie mbetet e hapur.