Gjykata e Dibrës ka shpallur moskompetencën për çështjen e vrasjes së 23-vjeçarit Renis Dobra dhe ka vendosur ta kalojë dosjen për hetime të mëtejshme në SPAK.

Ky vendim erdhi menjëherë pas caktimit të masës së sigurisë “arrest me burg” për dy vëllezërit Kristi dhe Aleksandër Bushgjoka, të akuzuar për rrëmbimin dhe mbytjen me litar të të riut.

Hetimet e deritanishme kanë zbuluar se Kristi dhe Aleksandri kanë vepruar në bashkëpunim me vëllain tjetër, Fatjonin, dhe me shtetasin Petrit Hoxha alias Petrit Çakrri. Katërshja dyshohet se fillimisht rrëmbyen Dobrën më 8 korrik 2025 dhe më pas e mbytën, duke hedhur trupin pranë liqenit të Shkopetit, ku u gjet mëngjesin e 9 korrikut.

Policia ka siguruar prova filmike dhe të tjera materiale që përfshijnë të gjithë të dyshuarit në rrëmbim dhe ekzekutim. Ndërkohë, Petrit Çakrri u arrestua disa ditë pas ngjarjes, në hyrje të Tropojës.

Pista kryesore e hetimit lidhet me një konflikt për drogë në Gjermani mes viktimës dhe vëllezërve Bushgjoka, megjithatë hetuesit nuk përjashtojnë mundësinë e një porosie nga persona të tretë.

Kalimi i dosjes në SPAK pritet të shënojë një tjetër fazë hetimi për zbardhjen e plotë të motivit dhe përgjegjësive të secilit prej të dyshuarve.