Një krim i përbindshëm që tronditi opinionin publik grek ka marrë fund në sallën e Gjykatës së Selanikut. Një 47-vjeçar u dënua me burgim të përjetshëm dhe 12 vite shtesë, pasi vrau gruan e tij dhe tentoi të vriste djalin e saj 30-vjeçar, të cilin e akuzonte absurdësisht se kishte marrëdhënie me nënën.

Gjykata e shpalli fajtor për vrasje me paramendim, tentativë vrasjeje dhe shkelje të ligjit për armët, pa i njohur asnjë rrethanë lehtësuese. Pas vendimit, ai u dërgua menjëherë në burg për të vuajtur dënimin.

⸻

Krimi që tronditi Greqinë

Ngjarja ndodhi mëngjesin e 1 dhjetorit 2024, në fshatin Angjelohori të Selanikut. 47-vjeçari, i bindur se gruaja e tij kishte një lidhje të ndaluar me djalin e saj nga martesa e parë, shkoi në banesë i armatosur me dy thika. Ai i sulmoi të dy menjëherë, duke vrarë gruan dhe plagosur rëndë djalin, i cili arriti të shpëtonte.

Sipas hetimeve, disa ditë para krimit ai kishte vënë re një “shenjë në buzët e gruas” dhe, në vend që të kërkonte sqarim, kishte ushqyer xhelozinë dhe paranojën. Për pesë ditë me radhë, ai qëndroi te vëllai, ku – siç tha prokuroria – planifikoi me qetësi vrasjen.

⸻

Dëshmia tronditëse e djalit:

“U ul në tryezë, përgatiti kafen dhe po bisedonte qetë. Papritur i tha nënës: ‘Ke lidhje me djalin tënd’, dhe e goditi me thikë. Unë bërtita dhe ai më sulmoi mua. Ai bërtiste: ‘Më thoni nëse është e vërtetë apo jo!’”, tregoi djali i viktimës në sallën e gjyqit.

⸻

Pretendimet e të pandehurit:

Në mbrojtjen e tij, 47-vjeçari këmbënguli në pretendimin absurd se gruaja dhe djali kishin marrëdhënie, duke thënë:

“Piva kafen dhe i thashë se kishte lidhje me djalin. Ajo më tha ‘mirë bëj’. Atëherë u errësova.”

Ai pranoi se kishte marrë thikat nga depoja e shtëpisë, por pretendoi se “nuk kujtonte” momentin e krimit. Gjykata hodhi poshtë çdo pretendim, duke e cilësuar si vrasje të qëllimshme dhe të planifikuar.

⸻

Prokuroria: “Një akt pronësie mbi jetën e një gruaje”

Prokurorja e çështjes theksoi se i pandehuri kishte vepruar me qetësi dhe vendosmëri, duke u kthyer në shtëpi me synimin për të vrarë.

“Ai nuk e goditi në moment xhelozie. U largua për pesë ditë, mendoi dhe u kthye i armatosur. Tha: ‘Nëse s’e kam unë, s’do ta ketë askush’. Ky është mentaliteti që vret çdo ditë gra në vendin tonë,” deklaroi ajo.

⸻

Vendimi përfundimtar:

Pas një procesi të gjatë dhe dëshmish tronditëse, Gjykata e Selanikut e dënoi 47-vjeçarin me burgim të përjetshëm plus 12 vite shtesë, pa asnjë lehtësim. Ai do të vuajë dënimin përfundimtar për një vrasje që la të shokuar gjithë Greqinë.