Ngjarja e rëndë e mëngjesit të sotëm (10 shkurt) ka tronditur zonën e Kurbin, pas një atentati mafjoz në një kompani të përpunimit të inerteve. Si pasojë, ekonomisti Selman Mihana humbi jetën, ndërkohë administratori Ardian Gjeloshi u plagos, duke qenë shenja e synuar.

Detajet deri më tani tregojnë se autorët e ngjarjes janë larguar me një makinë tip “Range Rover” të zi, e cila aktualisht është nën hetim për të verifikuar nëse është vjedhur.

Në bordin e kësaj makinë dyshohet të kenë qenë më shumë se 3 persona, të cilët kanë pasuar masat për të shmangur zbulimin nga kamerat e sigurisë, duke përdorur mbrojtëset nga dielli të montuara në automjet.

Efektivët e policisë po zhvillojnë kontrolle intensive në zonat e braktisura në përpjekje për të zbuluar gjurmë të mundshme. Gjithashtu, është nisur një kontroll në pikat e serviseve në rrugën Tiranë – Lezhë – Shkodër dhe Durrës në përpjekje për të identifikuar dhe kapur autorët e ngjarjes.