“Gruaja po bërtiste ‘ndihmë, ndihmë’”. Këto kanë qenë fjalët e fundit të Enkeleida Danajt, 40-vjeçares që u vra me thikë në Greqi këtë të enjte. Autori i dyshuar i kësaj ngjarjeje është bashkëshorti i saj, Eduard Danaj, 50 vjeç, i cili ende nuk është arrestuar.

Një grua, pronare e një biznesi pranë vendit të krimit, ka rrëfyer se çfarë ka ndodhur në orët e para të mëngjesit të ditës së sotme.

“Në mëngjes erdha rreth orës 05:10, po pija kafenë dhe një klient erdhi dhe më tha ‘mbylle derën, mos hap sepse vranë një grua aty. Kam marrë policinë’. Vajza ishte duke bërtitur ‘ndihmë, ndihmë’ dhe klienti telefonoi policinë,” tha ajo.

Enkeleida Danaj u vra në Menidi teksa po shkonte në punë. Ajo kishte një listë të gjatë denoncimesh ndaj ish-bashkëshortit për dhunë në familje. Eduard Danaj pritej të dilte para gjykatës të premten pas kallëzimit të fundit që i ishte bërë javën e kaluar. Megjithatë, deri tani nuk ka asnjë gjurmë të tij.

Enkeleida Danaj kishte dy fëmijë, të dy adoleshentë. Kjo ngjarje tragjike thekson nevojën urgjente për mbrojtje efektive dhe masa të rrepta kundër dhunës në familje, për të parandaluar tragjedi të tilla në të ardhmen.