Një ngjarje tragjike ka tronditur komunitetin shqiptar në Angli, ku Lorik Abazi, 22 vjeç, humbi jetën pas një sulmi me thikë në Croydon.

Ngjarja ndodhi rreth orës 01:15 të mëngjesit të së dielës, kur shërbimet e emergjencës gjetën tre të rinj të plagosur nga thikat. Abazi u transportua me urgjencë në spital, por përpjekjet e mjekëve për ta shpëtuar dolën të pasuksesshme. Dy të tjerët, të moshës 21 vjeç, u dërguan gjithashtu në spital, njëri prej të cilëve mbetet në gjendje kritike.

Policia lokale ka arrestuar shtatë persona në lidhje me ngjarjen. Mes tyre, tre dyshohet se janë autorët e sulmit, përfshirë dy vajza 25-vjeçe dhe një djalë 28-vjeç. Njëra prej vajzave është liruar më vonë me kusht. Hetuesit po punojnë për të sqaruar motivet dhe rrethanat e sherrit, ndërsa kanë bërë thirrje që kushdo që ka informacion ose pamje nga kamerat e sigurisë të bashkëpunojë me autoritetet.

Familjarët e Abazit e përshkruajnë të riun si një djalë të kujdesshëm, inteligjent dhe të sjellshëm, duke theksuar tronditjen e madhe që ka shkaktuar humbja e tij.

Ngjarja vijon të jetë nën hetim të plotë nga autoritetet britanike, ndërsa komuniteti shqiptar në Angli është duke u solidarizuar me familjen e viktimës.