Një grua 49-vjeçare me origjinë shqiptaro-maqedonase, Sadjide Muslija, është gjetur e vrarë në banesën e saj në Pianello Vallesina, provinca e Ankonës, Itali. Trupi i saj kishte shenja të shumta dhune, ndërsa policia po kërkon bashkëshortin e saj, 50-vjeçarin Nazif Muslija, i dyshuar për rrahjen për vdekje.

Çifti ndodhej në proces divorci, por burri kishte rikthyer bashkëjetesën, pavarësisht se viktima kishte bërë më parë disa denoncime për dhunë familjare. Në prill të këtij viti, ai ishte arrestuar për dhunë fizike ndaj saj, ndërsa më parë kishte thyer derën e dhomës së saj me sëpatë, duke e kërcënuar.

Autoritetet theksojnë se gruaja ishte nën dhunë të vazhdueshme prej dy vitesh dhe se bashkëshorti ka precedentë të dhunës familjare. Hetimet për kapjen e tij dhe zbardhjen e plotë të ngjarjes vijojnë.