Këtë të enjte, 48-vjeçarja Elvira Tahiraj ka dalë para Gjykatës së Shkallës së Parë në Sarandë, pasi akuzohet për vrasjen e bashkëshortit të saj, 55-vjeçarit N. Tahiraj. Ngjarja e tmerrshme ndodhi në orët e para të mëngjesit të së martës, kur Elvira dyshohet të ketë goditur bashkëshortin e saj për vdekje me një sopatë, ndërkohë që ai ishte në gjumë. Çifti kishte tre vajza, njëra prej të cilave ka njoftuar policinë pas ngjarjes tragjike.

Në përfundim të seancës, Gjykata e Sarandës e ka vlerësuar të ligjshëm arrestimin e Elvirës për veprën penale “vrasja për shkak të marrëdhënieve familjare” dhe ka vendosur masën e sigurimit “shtrim i përkohshëm në një spital psikiatrik”.

Avokatja e caktuar nga shteti ka mbrojtur gruan gjatë seancës gjyqësore. Viktima dhe gruaja e tij, të dy me origjinë nga Kolonja, jetonin në Metoq pas disa periudhash me qira, duke pasur të ardhura të pakta, pasi ai ishte i vetmi që punonte. Fqinjët i përshkruajnë viktimën si një njeri të qetë dhe punëtor, ndërsa dyshojnë se Elvira vuante nga probleme të shëndetit mendor dhe kishte sjellje të çuditshme që kishin ndikuar në mungesën e komunikimit brenda familjes.