Një 45-vjeçar shqiptar ka humbur jetën mbrëmjen e së premtes pas një incidenti të rëndë me armë zjarri në fshatin Larum të qytetit Geel, në Belgjikë. Viktima është identifikuar si Marko Beka, banues prej vitesh në Geel dhe me profesion taksist.

Sipas mediave belge dhe burimeve zyrtare, ngjarja dyshohet se ka nisur pas një debati mes Bekës dhe disa klientëve, i cili ka dalë jashtë kontrollit dhe ka përfunduar me përdorimin e armës së zjarrit. Pas të shtënave, autorët janë larguar në këmbë nga vendngjarja dhe aktualisht ndodhen në kërkim nga policia.

Dëshmitarë okularë kanë parë 45-vjeçarin të shtrirë në tokë dhe kanë njoftuar menjëherë shërbimet e emergjencës. Megjithë ndërhyrjen e shpejtë të ambulancës, Marko Beka ndërroi jetë si pasojë e plagëve të marra.

Zona përreth u rrethua për disa orë nga policia, ndërsa në vendngjarje mbërritën hetuesit, laboratori kriminalistik dhe mjeku ligjor. Hetimet vijojnë për të zbardhur plotësisht rrethanat e incidentit dhe për identifikimin e autorëve.

Marko Beka ishte baba i tre fëmijëve, të moshave 5, 11 dhe 17 vjeç, dhe drejtonte një biznes privat taksish në Geel. Bashkëshortja e tij, Izabela, e ka përshkruar viktimën si një njeri të qetë, të sjellshëm dhe shumë social, i respektuar nga komuniteti dhe pa konflikte me askënd.

Autoritetet belge bëjnë apel për bashkëpunim nga qytetarët, duke kërkuar çdo informacion që mund të ndihmojë në zbardhjen e plotë të kësaj ngjarjeje të rëndë, e cila ka ndodhur rreth orës 21:00, pranë një parku pas kishës në qendër të fshatit Larum.