Presidenti i Serbisë, Aleksandër Vuçiç, ka deklaruar se Serbia do të nisë hetimet për vrasjen e efektivit Afrim Bunjaku më 24 shtator 2023 në fshatin Banjskë të Zveçanit gjatë përplasjes me një grup të armatosur. Në një intervistë për Reuters, Vuçiç u shpreh se Serbia dënon vrasjen e efektivit të Policisë së Kosovës duke nënvizuar se shteti serb “do të nisë procedurat gjyqësore” dhe do të hetojë të dyshuarit.

Ndër të tjera, në intervistën për Reuters, president i Serbisë foli dhe për vrasjen e njërit nga pjesëtarët e grupit terrorist. Ai tha se Policia e Kosovës e ka qëlluar nga një distancë e afërt prej 1 metri me plumb në kokë pavarësisht se sipas Vuçiç ai ishte dorëzuar.

Këto akuza janë hedhur poshtë nga zëvendës komandanti rajonal për veriun e Kosovës, Veton Elshani, i cili është shprehur për Reuters se “Kjo është marrëzi, oficerët tanë nuk do ta bënin kurrë një gjë të tillë. Njërit prej të arrestuarve i dhamë ndihmën e parë në terren për t’i shpëtuar jetën pasi kishte pësuar lëndime.” Po ashtu, presidenti Vuçiç komentoi deklaratat e presidentes së Kosovës, Vjosa Osmani e cila ka thënë se Serbia ishte përfituese e sulmit mbi Policinë e Kosovës në Banjskë të Zveçanit.