Presidenti i Serbisë, Aleksandar Vuçiç, dhe lideri i entitetit të Republika Srpska (RS) të Bosnje dhe Hercegovinës, Milorad Dodik, zhvilluan sot një takim në Beograd, ku diskutuan situatën politike në rajon dhe tensionet e fundit në Bosnje.

Pas takimit, Vuçiç shprehu shqetësim të thellë mbi zhvillimet e fundit, duke theksuar se shqetësimet e Dodik janë të justifikuara, veçanërisht në lidhje me rrezikun e mundshëm të konflikteve të armatosura.

“Kur dëgjoni se dikush mund të përgatitet për luftë, nuk mund të mos jeni më shumë se i shqetësuar,” deklaroi Vuçiç.

Presidenti serb ripërsëriti se dialogu mbetet i vetmi mjet për zgjidhjen e mosmarrëveshjeve, por ai shprehu zhgënjimin e tij për mungesën e reagimit nga autoritetet në Sarajevë.

“Herën e fundit që isha në Banja Luka, i kërkova udhëheqjes së RS dhe Presidentit Dodik që të dërgonin një kërkesë për bisedime me zyrtarët në Sarajevë. Një ditë pas kësaj, përveç një breshëri fyerjesh patologjike, nuk morëm asgjë tjetër si përgjigje,” tha Vuçiç.

Ai paralajmëroi gjithashtu për ndikimin e faktorëve ndërkombëtarë në situatën rajonale, duke pretenduar se disa vende evropiane mund të jenë të interesuara për të dobësuar Serbinë dhe për të ndikuar në fatin e Republika Srpska.

“Ka gëzim në Sarajevë për gjithë këtë, dhe ata po përpiqen të përdorin Evropën si një kalë trojan për projektet e tyre politike – shkatërrimin e RS. Kjo është nxitur gjithmonë nga narrativa emocionale e ‘hakmarrjes për Srebrenicën’, por qëllimi racional është të përfitohet nga ky moment për të dobësuar RS,” theksoi Vuçiç.

Ai shtoi se ka pasur përpjekje për të dobësuar Serbinë në mënyrë që ajo të mos jetë në gjendje të ndihmojë RS në të ardhmen.

Ky takim vjen në një kohë kur tensionet politike në Bosnje dhe Hercegovinë mbeten të larta, ndërsa Republika Srpska vazhdon të sfidojë autoritetin qendror të Sarajevës, duke kërkuar më shumë autonomi.