Ministri në detyrë i Punëve të Brendshme të Kosovës, Xhelal Sveçla, ka reaguar sot pas një incidenti të ndodhur në zonën kufitare mes Kosovës dhe Serbisë, ku sipas tij, Xhandarmëria serbe plagosi dhe më pas rrëmbeu një qytetar kosovar me inicialet M.V.

Sveçla e ka cilësuar këtë veprim si akt agresiv dhe destabilizues, duke theksuar se Serbia po vazhdon të cenojë hapur integritetin territorial të Kosovës dhe të përdorë politika frikësimi ndaj qytetarëve. “Ky është një akt i përsëritur dhe i pandëshkuar. Dy vite më parë pjesëtarë të njësive speciale të Serbisë hynë brenda territorit tonë dhe rrëmbyen tre pjesëtarë të policisë sonë,” shkroi ministri.

Ai kërkoi reagim të menjëhershëm nga faktori ndërkombëtar për të parandaluar përsëritjen e akteve të tilla, duke theksuar se këto veprime përbëjnë shkelje të rëndë të kufijve shtetërorë dhe të të drejtave të qytetarëve kosovarë.

Policia e Kosovës konfirmon se qytetari M.V. u plagos dhe u rrëmbye nga Xhandarmëria serbe, ndërsa hetimet dhe monitorimi i situatës vazhdojnë.