Kandidati i Koalicionit Euroatlantik për Shkodrën, Xhevdet Amuli, ka reaguar ndaj deklaratave të ish-kryeministrit Sali Berisha, duke e sfiduar për disa çështje që lidhen me pazaret politike dhe listat e mbyllura të opozitës së vjetër.

Amuli akuzon Berishën për futjen e Jozefina Topallit në listën e sigurt të Tiranës, duke pretenduar se ajo mori para nga Edi Rama në zgjedhjet e 2021 për t’i marrë vota Partisë Demokratike në Shkodër. Ai gjithashtu e sfidon për shitjen e Bashkisë së Shkodrës dhe për emërimin e Benet Becit si kryetar, duke e cilësuar si një marrëveshje të fshehtë mes Berishës dhe Ramës.

“Pse nuk i pyete shkodranët për futjen e Ilir Metës në listën tënde? Apo për 700 mijë eurot që dy nga kandidatët e tu kanë paguar për të qenë në listën e mbyllur të Shkodrës?”, shkruan Amuli.

Ai thekson se Berisha është i trembur nga rritja e mbështetjes për Koalicionin Euroatlantik dhe se Shkodra nuk do të shitet më për interesa politike.

“Nuk do të të lëmë ta shesësh Shkodrën sërish te Rama! Natën, Doktor!” – përfundon mesazhin e tij Amuli.