Hetimet për ngjarjen e rëndë të vetëvrasjes së 45-vjeçarit Olsi Ibro kanë zbuluar detaje të reja që kanë ngritur një pistë të re hetimi. Burime nga grupi hetimor bëjnë me dije se, pas sekuestrimit të kamerave të sigurisë në zonë, është konstatuar një skenar i mundshëm i ngjarjes.

Sipas pamjeve të siguruara nga kamerat, 45-vjeçari është parë i vetëm brenda në makinën e tij të parkuar para pallatit ku më pas u vetëhodh. Ibro ka qëndruar për një kohë të gjatë i vetëm në makinë, gjë që ka ngritur dyshime se ai mund të ketë konsumuar helm gjatë kësaj kohe.

Dyshohet se, për shkak të gjendjes shëndetësore të rënduar nga vetëhelmimi, Ibro është ngjitur më pas në pallatin në ndërtim për t’u vetëhedhur dhe për t’i dhënë fund jetës. Policia është në pritje të rezultateve të ekspertizës mjekoligjore për të vërtetuar nëse ai është vetëhelmuar para se të hidhej nga pallati.

Hetimet vazhdojnë për të përcaktuar të gjitha rrethanat dhe shkaqet që çuan në këtë akt tragjik.