Është bërë publike dëshmia e 29-vjeçarit Jozefin Marku, i cili u shoqërua nga Policia e Shtetit mbrëmjen e djeshme pas incidentit të rëndë të ndodhur brenda shtëpisë së Big Brother VIP Albania 4, ku ai goditi fizikisht banorin Besart Kelmendi (Gjesti).

Burime nga komisariati nr.6 në Tiranë bëjnë me dije se gjatë marrjes në pyetje, Marku është shprehur:

“Nuk e kam pasur në plan ta godisja. Ishte një moment impulsiv. Nuk e përballova dot më presionin dhe provokimet. E pranoj që gabova, por nuk kam pasur asnjë qëllim për dhunë serioze apo lëndim.”

Ai ka deklaruar gjithashtu se nuk ka pasur konflikt fizik më herët me Gjestin dhe se veprimi ishte i çastit dhe pa menduar pasojat.

Policia ka proceduar Markun penalisht për “goditje për shkak të marrëdhënieve shoqërore”, ndërsa pritet edhe vendimi përfundimtar nga prokuroria dhe produksioni i spektaklit, i cili deri tani ka ruajtur një qëndrim të rezervuar, por është nën presionin publik për përjashtimin e tij nga gara.

Ngjarja ka shkaktuar një valë të madhe reagimesh në rrjetet sociale, ku publiku kërkon masa të menjëhershme disiplinore dhe refuzim të çdo akti dhune, sidomos në një spektakël që ndiqet nga një audiencë kaq e gjerë.